Talnastígur varð ekki til við skrifborð á einni nóttu. Hann á rætur að rekja til margra ára kennslu í stærðfræði og þeirrar einföldu staðreyndar að nemendur læra ekki allir á sama hátt eða á sama hraða.
Hugmyndin er að skipta stærðfræðinni niður í viðráðanleg skref. Nemandinn vinnur með eitt viðfangsefni í einu, æfir sig, prófar skilning sinn og heldur síðan áfram þegar hann er tilbúinn.
Frá Lotum að Talnastíg
Upphaf Talnastígsins má rekja til námsefnis sem ég kallaði Lotur og þróaði á þeim árum sem ég kenndi unglingum stærðfræði.
Loturnar urðu til út frá þörf sem ég sá aftur og aftur í kennslustofunni. Nemendur voru staddir á ólíkum stöðum, lærðu á mismunandi hraða og þurftu ekki allir sömu útskýringar eða sömu æfingu. Með því að skipta námsefninu niður í smærri og afmarkaðri hluta varð auðveldara fyrir hvern nemanda að vinna áfram á sínum forsendum.
Nú hafa Loturnar fengið nýtt líf sem Talnastígur. Grunnhugmyndin er sú sama, en námsefnið hefur verið endurskoðað, uppfært og byggt upp að nýju með fjölbreyttari verkefnum, skýrari framsetningu og stafrænu námsumhverfi.
Hugmyndin á bak við Talnastíg
Í Talnastígnum er ekki gert ráð fyrir að allir nemendur séu á sama stað á sama tíma. Sumir þurfa meiri æfingu, aðrir minni. Sumir þurfa að sjá hlutina útskýrða á annan hátt og stundum þarf einfaldlega aðeins meiri tíma.
Þess vegna ræður nemandinn hraðanum. Hver áfangi er afmarkað skref á leiðinni og markmiðið er ekki að komast sem fyrst í gegnum efnið heldur að skilja það sem verið er að læra.
Mistök eru líka hluti af náminu. Prófin eru ekki hugsuð sem endastöð heldur leið til að sjá hvað er komið og hvað þarf mögulega að skoða betur áður en haldið er áfram.
Um höfundinn
Talnastígur er þróaður af Ragnari Valgeiri Jónssyni, fyrrverandi stærðfræðikennara sem kenndi unglingum stærðfræði í um 20 ár.
Námsefnið byggir því ekki aðeins á hugmynd um hvernig stærðfræði mætti kenna, heldur á langri reynslu úr kennslustofunni – af því að útskýra, prófa, breyta og leita nýrra leiða þegar sú fyrsta virkaði ekki.
Talnastígur er afrakstur þeirrar reynslu og þeirrar sannfæringar að stærðfræði verði viðráðanlegri þegar hún er brotin niður í skýr skref og nemandinn fær svigrúm til að vinna á sínum hraða.
Spurningar?
Ef þú hefur spurningar um Talnastíg, námsefnið eða hvaða áfangi gæti hentað, er þér velkomið að hafa samband í tölvupósti: [email protected]